Як сом постала GKS стипендиста

Здраво шицким! Ево ме знова зоз другу обяву, и през ню ше врациме скроз на початок. У тей обяви виприповедам же як сом пришла студирац до Кореї прейґ стипендиї влади Републики Кореї, и як то шицко почало.

Ученє Корейского язика шицко пременєло

Корейски язик сом почала учиц кед сом була студент на Академиї Уметносци, и тота мала одлука шицко пременєла. Нє фасцинантне же як єдна одлука може так уплївовац на наш живот?

Ище на основних студийох сом мала жаданє студирац у иностранству, алє сом нажаль нє мала таку нагоду. Алє тот сон остал дзешка у позадини. Барз сом подзековна же ми ше то и витворело, а поготово прето же то у Кореї.

Шицко почало концом авґуста 2024. року. Ищє и скорей того сом длуго роздумовала же чи сцем направиц даки вельки крочай и опробовац ше у тим. Нєодлуга сом направела одлуку хтора була єдна од моїх найважнєйших одлукох у живоце.

Велї од вас знаю же мой напрям у штреднєй школи и на факутету бул ґрафични дизайн, и я сама була убедзена же наставим зоз дизайном, у академским смислу. Алє, як особа зоз велїма интересованями, цошка ме цагало на други бок, ґу Корейских студийох. Як сом почала учиц Корейски язик и дознавала баржей о Кореї, була сом фасцинирана зоз єй културу, язиком, историю и єй розвойом. Сцела сом ище вецей и детальнєйше дознац о Кореї, алє нє лєм преґ интернету, лєбо Youtube, алє баш студирац и достац академске знанє о Кореї.

Дознаванє о стипендиї

О GKS стипендиї сом дознала ище на факултету, алє, поправдзе, видзело ми ше же то таке цошка далєке, нєможлїве, же ше таки ствари витворюю лєм другим, а нє мнє. Тота стипендия ма барз вельку кокуренцию, и теди кед сом роздумовала о нєй, анї сом нє думала же бим я могла буц кандидат.

Ище вше нє верим же сом так вишла зоз комфор зони, аплицирирала, и на концу и була вибрана. Можем повесц же ше цешим зоз собу. Кед я могла у таким дачим успец, вец можебуц велї ствари хтори нам ше видза же су нє можлїви уствари можлїви, лєм кед маме шмелосци пробовац. 😉

Цо то GKS стипендия?

GKS то стипендия влади Републики Кореї, хтора финансує студиранє у Кореї. Тота стипендия оможлївює студентом же би наставели свойо образованє през основни, мастеr лєбо дохторски студиї у Кореї. Найлєпша часц того шицкого то же тота стипендия покрива шицки стредства студираня: цалу школарину, авионску карту, плус дава мешачно стредства за каждодньови потреби. ( Стипендия кажди мешац дава коло 80 тисячи динари )

Скорей як цо вам повем же як випатрало мойо искуствиє, перше обяшнїм же як тота стипендия випатра, яки то процес аплицираня, прето же цали процес досц компликовани, алє пробуєм на єдноставни способ обяшнїц.

Єст два способи аплицираня за GKS: прейґ Амбасади лєбо прейґ Универзитету. Нє кажда держава ма можлївосц аплицирац на обидва способи. Наприклад, у Сербиї мож аплицирац лєм прейґ амбасади.

Цо то значи? У сущносци, то значи же першу рунду водзи лєбо амбасада лєбо универзитет.

Цали процес ше состої зоз даскельо рундох. Поправдзе, превельо рундох.. 😪

И процес БАРЗ длугоки. И єст БАРЗ вельо документи, хаха..

Понеже я аплицирала прейґ амбасади, обяшнїм же як тот процес випатрал.

Перша рунда — фаза 1:

-Зберанє шицких потребних документох и придац их Корейскей Амбасади у Сербиї за прeвeрйoванє документох.

Фаза 2:

-Кед ше прейдзе преверйованє документох, вецка идзе интервю зоз Амбасади.

Друга рунда — фаза 2:

- Кед ше успишно прейдзе интервю, Амбасада препоручує кандидатох NIEED ( NIIED то Национални институт за интернационалне образованє, орґанизация цо прави тоту стипендию зоз владу Републики Кореї. )

Фаза 2:

-NIEED препатра препоручени кандидати и одлучує же хто преходзи до финалней рунди.

Треца рунда — фаза 1:

-NIIED посила мена одобрених кандидатох универзитетом цо кандидати вибрали. У тей фази, универзитети препатраю кандидатох и посилаю одлуку жє чи су прияти чи нє. У даєдним случаю, єст и додатни интервю зоз универзитетом.

Нажаль, лєбо, на на щесце, завиши як патриш, я була єдна зоз тих цо мали додатни интервю зоз єдним универзитетом, хаха. 😪

Фаза 2:

-Кандидати хтори аплицирали прейґ амбасади, виберали три универзитети. Кед су прияти голєм на єден зоз тих трох, званично постали GKS стипендисти!

...Барз вельо фази..

Од початного крочая до финалней одлуки, цали процес тирвал од 20. фебруара до 5. юна. То можебуц и нє звучи так длуго, алє кед ше чека на дацо таке важне, кажди дзень тирва як єден вик.

Громада папиролоґиї..

Ище єдна ствар хтору мушим спомнуц то же кажда держава ма одредзену квоту особох хтори можу достац стипендию. Сербия ма квоту штири. ЛЄМ штири. Мож видзиц же яка вец велька и конкуренция. Та кед сом дознала же я була вибрана як єдна зоз штирох особох, можеце задумац же яка сом була щешлїва.

Можем повесц же ствар хтора одберала найвецей часу у цалим процесу то зберанє и рихтанє шицких потребних документох. Барз барз вельо документи були потребни: диплома, транскрипт, писма препорученя, кресцене писмо, и велї други опцийни документи як награди, рижни други сертификати, сертификати язичней схопносци и друге.

Медзитим, по моїм думаню, два найважнєйши документи то Мотивационе писмо и План студираня. Тоти два документи у сущносци нагода же биш себе представел, яки твойо мотивациї, чом ши вибрал свой напрям, и чом баш ти заслужуєш тоту стипендию. Зато сом пошвецела барз вельо часу и труду у писаню, виправяню, и полираню тих документох же бим ше представела цо лєпше.

У исти час сом мала и годзини Корейского язика и пририхтовала сом ше за TOEFL тест, тест схопносци английского язика, цо було условиє мойого напряма.

Було и велї нєсподзивани проблеми у цеку рихтаня, алє нє войдзем до вельких детальох. Єдна од почежкосцох була достац диплому зоз Академиї.. Но, алє, нє сцем ше здогадовац тих проблемох. Окрем того, бул ту и процес доставаня Апостил печатох на рижни документи и вецка зоз шицких тих документох правиц додатни три копиї за три универзитети и шицки документи официйно преложиц на Английски язик. Нє тунї процес. 💸💸

Интервю зоз Амбасаду

После пар мешацох збераня документох, доставаня апостил печатох, Английского преводу и полиранє документох, бул конєчно час за интервю зоз Амбасаду. Кед сом прешла тот перши крочай 1. фази, була сом поволана на интервю зоз Корейску Амбасаду у Сербиї прейґ Зоом-а. Була сом БАРЗ нервозна. Длуго сом рихтала одвити на могущи питаня и вичитовала мотивационе писмо и план студираня же бим була порихтана. Интервю бул на Английским язику и питали ми ше питаня як цо то: Як ши дознала за тот програм? Чи думаш же будзеш мац почежкосци у Кореї? Яки твойо плани за будучносц? ( Питали ми ше и най ше представим на Корейским язику ), плус ище даяки питаня.

Понеже сом була барз барз нервозна, як ше закончел интервю, так ми мозоґ станул и нє могла сом ше анї здогаднуц же як сом одвитовала на їх питаня, хаха.. Интервю тирвал коло 8 минути, и цали час ми шерцо барз дуркало пре нервозу.

Длугоке чеканє

После интервюа, нє могла сом нїч робиц, лєм чекац. То поправдзе було и найчежше. Лєм анксиозно чекац мейл нотификациї и модлїц ше за добри вистки. Кажда фаза ми дала олєгчанє, а у исти час и нову причину за бриґу, чи прейдзем шлїдующу фазу.

Було вельо хвильки дзе сом нє мала довирия же успем. Тота стипендия ма барз вельку конкуренцию, и знаюци же лєм штири особи зоз Сербиї ю можу достац ме ище баржей правело нервозну. Алє, нїч сом друге нє могла робиц лєм чекац и наздавац ше же шицко прейдзе добре.

Ище єден интервю?!

На концу сом прешла прешла и другу фазу у Амбасади, другу рунду зоз NIEED, и прешла до остатнєй фази, дзе универзитети маю конєчну одлуку. Баш кед сом подумала же нє мам вецей интервюи, єден од универзитетох цо сом вибрала глєдал додатни интервю. Думала сом себе же, но цо тераз? То добри знак, чи нєдобри? Мала сом интервю зоз Hanyang Универзитетом прейґ Зоом-а, и бул на Английским язику. Тирвал коло 10 минути и питали ми ше подобни питаня як и у Амбасади, же чом сом вибрала тот напрям; яки мойо цилї за будучносц и таке. Гоч сом була нервозна, интервю прешол лєпше як цо сом обчековала. Можебуц прето же сом уж пребила ляд зоз интервюом у Амбасади.

Зоз другима двома универзитетами цо сом вибрала сом нє мала интервю, та сом заш наставела свою роботу. Чеканє.

...

Дзень резултатох! 🎉

Конєчно, 5. юн! Дзень дзе конєчно дознам резултат!

Понеже ше нє знало же у хтори час универзитети буду посилац мейли, нє могла сом ше ментално порихтац, хаха. Плус ту була и розлика у часу. Здогадуєм ше ноци скорей того дня, пробовала сом спац, алє нє могла сом спац як треба. Будзела сом ше кажди 10 минути же бим опатрела мейл.

И вецка сом достала перши мейл!!!

Достала сом мейл од Dong-a Универзитету же сом прешла трецу рунду и же сом прията!!

Було коло 3 годзин рано и сцела сом скакац по хижи и кричац од радосци. Гоч Dong-a Универзитет нє бул мой перши вибор, кед ши прияти на голєм єден од трох универзитетох значи же ши званично прияти! Була сом званично GKS студент! Йойчала сом од радосци. После коло двох годзинох, достала сом мейл же ме прияли и на Hanyang Универзитет.

А вецка после пар годзинох, достала сом мейл од Yonsei Унивезритету же ме прияли, а тот универзитет ми бул перши вибор!

Стварно сом нє могла вериц. После тельо уложеного часу и труду, мой сон ше випольнєл!! И ище же ме шицки три универзитети прияли! И тераз кед роздумуєм о тих хвилькох, шерцо ми почнє моцно дуркац.

Патраци назадок, барз ми фасцинантне же до того шицкого дошло пре єдну малу одлуку, же сцем научиц Корейски язик. Єдна одлука ме одведла на други конєц швета.