Мали увод :)

Здраво шицким! ☺️ Конєчно починам писац свой блоґ ! Дахто уж знал же сцем писац блоґ о моїм студираню у Южней Кореї, и ево, конєчно починам. Сцела сом почац писац ище давно, алє, поправдзе, углавним сом барз завжата кажди дзєнь пре школу, та сом нє була у могущносци анї почац. Тот блоґ нє могол настац без помоци мойого леґиня, Кмйонґа, хто програмерски мозоґ у основи того проєкту. 😊 Велї цо буду читац мой блоґ то моя фамелия, родзини и пайташе. Блоґ будзе на двох язикох - на английским и на руским, и каждираз кед обявим обяву, будзе на обидвох язикох. ( Можем повесц же ми то однєє вельо часу, алє сцем подзелїц шицко тото и зоз тима хтори нє знаю бешедовац по руски! )

Тот блоґ будзе мац два катеґориї - мой каждодньови живот и обяви о Кореї. Сцела сом мац окремну катеґорию пошвецену Кореї же бим могла подзелїц рижнородни ствари о живоце ту, а и о самей Кореї, бо верим же велї нє упознати барз зоз Корею, лєбо им є интересантна и любели би знац вецей. Ту буду вшелїяки интересантни тексти, та ше наздавам же ше вам будзе пачиц. ☺️

Нє сиґурна сом як часто будзем обявйовац, алє ше наздавам же сом годна частєйше, кед час дошлєбодзи.

Уж прешло 6 мешаци як цо сом пришла ту! Стварно нє можем вериц же час так швидко прелєцел! Вельо того ше уж послучовало и лєдво чекам ше врациц на початок моєй авантури и виприповедац и подзелїц як то шицко почало. На каждей обяви будзе годно охабиц коментар, та кед було хто сце дацо написац лєбо ше опитац, шлєбодно.

На блоґу будзе и окремни бок хтори ше будзе волац ‘’ ґалерия ‘’, дзе буду позберани шицки слики зоз шицких текстох, за тих хтори сцу опатрац слики цо сом подзелєла.

А тераз, дакуз о нас:

Мено: Александра Русковски, алє за векшину сом Сашка. 😁

-Хвильково учим Корейски язик на Йонсе Универзитету - Школи за язик, а по законченю школи язика будзем студирац мастер студиї , напрям - Корейски студиї у септембру 2026.

-любим: уметносц, музика, мойо мачки, фотоґрафия, кнїжки, шпиванє, танцованє, варенє, полимерна ґлина, ґитара, клавир, квеца, природа, слунковити днї

Мено: Кмйонґ / Презвиско: Джонґ ( мой леґинь ☺️ )

-зоз Кореї; жил у Канади 7 роки дзе робел як програмер. Там исто ходзел до школи за Француски язик. Тераз ше знова врацел до Кореї же би бул ту под час моїх студийох.

-Зна бешедовац по Корейски, Английски, Француски ( дакуз), и хвильково учи Руски язик ( Я го учим и можем повесц же му идзе барз барз добре :o )

-люби: бежац, єсц, програмирац, вожиц ше на бициґли, технолоґийни ствари, Руски язик.

Корейски мена барз чежко преложиц по руски и як я написала, нє мож повесц же ше баш так и чита його мено, та, можеце кликнуц ту и послухац як го вигвариц. 😊

Перша обява нє така длугока, понеже то лєм мали увод. Видзиме ше у шлїдующей обяви а по тамаль, вельки поздрав од нас зоз Кореї. ☺️

Мали увод :)

Коментари